सुर्खेत, १४ माघ । जुम्लाको गोठी गाउँमा भीषण आगलागी भएको छ । जिल्लाको तिला गाउँपालिकाको गोठी गाउँमा मंगलबार बेलुका आगलागी हुँदा ३० घर जलेर नष्ट भएको प्रहरीले जनाएको छ ।
जुम्लाका सहायक प्रमुख जिल्ला अधिकारी नन्दराम चौलागाइका अनुसार त्यत्तिकै संख्यामा चौपाया पनि जलेर मरेका छन् । सुधारिएको चुल्होको माथिल्लो भागबाट एक घरको छानोमा रहेको घाँसमा आगो सल्किएपछि गाउँभरि फैलिएको उनले जानकारी दिए ।
अहिले आगलागी भएको ठाउँतर्फ प्रहरीको टोली गइसकेको छ । आगलागी भएको जानकारी पाएलगतै नेपाल प्रहरी, सशस्त्र र नेपाली सेनाको टोली घटनास्थलतर्फ गइसकेको चौलागाइले जानकारी दिए । आगो नियन्त्रणमा नरहेका कारण घरहरु अझै जलेको हुन सक्ने आँकलन गरिएको उनको भनाई छ ।
काठैकाठका घरहरु बढी भएकाले आगलागी बढेको आशंका गरिएको छ ।आगलागी भएको गाउँसम्म पुग्न जिल्ला सदरमुकामबाट करिब चार घण्टा लाग्छ । घट्नाको थप विवरण आउन बाँकी रहेको छ ।
