एजेन्सी, २० माघ । जापानले जारी स्वास्थ्य संकटकाललाई थप एक महिना लम्ब्याएको छ । कोभिड–१९ विरूद्धको अभियान अझै सफल भई नसकेको भन्दै जापानले आगामी मार्च ७ गतेसम्मका स्वास्थ्य सङ्कटकाललाई बढाएको हो ।
जापानी प्रधानमन्त्री योशीहिदा सुगाले मंगलबार काेभिड-१९ महामारीको कारण लगाइँदै आएको संकटकाललाई थप एक महिनाको लागि विस्तार गरेको जानकारी दिए ।
सरकारको कोभिड–१९ कार्यदलको बैठकपछि प्रधानमन्त्रीले जापानका ११ वटा प्रान्तमध्ये हाल टोकियो र छिमेकी कानागावा, चिबा र सैतामा क्षेत्रका साथै ऐचि, गिफु, ओसाका, क्योटो, ह्योगो र फुकुओका क्षेत्रहरुमा रहेको कोभिड–१९ संकटकाललाई थप बढाउने सरकारले घोषणा गरे ।
यसैबीच राजधानीको उत्तरमा अवस्थित तोचिगी प्रान्तमा कोभिडको समस्या कम भएको भन्दै यसलाई आपतकालिन सूचीबाट हटाइने पनि प्रधानमन्त्रीले बताए । दक्षिण टापु ओकिनावा प्रान्तमा भने सङ्कटकाल थप गर्ने वा नगर्ने भन्ने निर्णय भइसकेको छैन ।
जापानी सरकारले सबैभन्दा पहिले ग्रेटर टोकियो क्षेत्र र ओसाकालगायत सघन आबादी भएका अन्य प्रमुख सहरी क्षेत्रहरु को लागी जनवरीमा घोषणा गरेको सङ्कटकाल यही फेब्रुअरी ७ मा का लागि रहेको थियो ।
आपतकालिन अवस्थाको घोषणा भएदेखि नै मानिसहरूलाई घरबाहिर अनावश्यक यात्रा गर्नबाट जोगिन र घरबाट काम गर्न आग्रह गरिएको छ ।
जापानभर मंगलबारसम्म तीन लाख ८९ हजार ५१८ व्यक्ति सङ्क्रमित भएका छन् भने पाँच हजार ७२२ जनाको मृत्यु भएको छ । जापानको सबैभन्दा बढी प्रभावित राजधानी सहर टोकियोमा सङ्क्रमित भएका व्यक्तिको सङ्ख्या एक लाखभन्दा बढी पुगेको छ ।
