काठमाडौं, ६ फागुन । नेपाली कांग्रेसको कोभिड–१९ अनुगमन समितिले कोरोना भाइरस विरुद्धको खोप लगाउन ज्येष्ठ नागरिकलाई प्राथमिकतामा नराखेको भन्दै असन्तुष्टि जनाएको छ ।
बिहीबार पार्टी कार्यालय सानेपामा पत्रकार सम्मेलन गर्दै समितिका संयोजक एवं कांग्रेस सह–महामन्त्री प्रकाशसरण महतले प्राथमिकताका आधारमा ज्येष्ठ नागरिकलाई समेत समेटेर खोप वितरण नगरेकोमा असन्तुष्टी जनाउँदै सरकारको ध्यानाकर्षण गराएका हुन् ।
उनले सरकारले कोभिड–१९लाई लापरबाही रूपमा लिएको आरोप लगाए । भारतले अनुदानमा दिएको खोपको वितरण पारदर्शी हुन नसकेको बताउँदै उनले सरकारले खोप वितरणको कार्ययोजना नबनाएको आरोप लगाए ।
उनले मापदण्ड पुरा नभएका खोपले जोखिम बढाउने भन्दै डव्लुएचओको मापदण्डका खोप ल्याउन सरकारको ध्यानाकर्षण गराए ।
उनले अहिले कोरोना भाइरसको संक्रमण कम देखिए पनि नयाँ प्रकारको भाइरसको जोखिम उत्तिकै रहेकाले जोखिम न्यूनिकरणका लागि सरकार गम्भीर बन्नुपर्ने धारणा राखे ।
