काठमाडौं, ६ फागुन ।
रेडियो नेपालमा सात लाख भन्दा धेरै अनियमितता गर्ने तत्कालिन लेखा अधिकृत अख्तियार दुरुपयोग अनुसन्धान आयोगको फन्दामा परेका छन् ।
पूर्व लेखा अधिकृत टोपबहादुर महताराले सात लाख ४० हजार अनियमितता गरेका हुन् । उनीविरुद्ध आयोगले सोमबार मुद्दा दायर गरेको छ ।
उनले कर्मचारी कल्याण कोषको रकम हिनामिना गरेको आयोगले जनाएको छ ।
रेडीयो प्रसार सेवा विकास समिति (रेडीयो नेपाल) सिंहदरबार काठमाडौंका तत्कालिन लेखा अधिकृत टोप बहादुर महतराले आफु रेडीयो प्रसार सेवा विकास समिति (रेडीयो नेपाल)को लेखा अधिकृतको रूपमा आर्थिक महाशाखा अन्तर्गत कर्मचारी कल्याण कोषको समेत जिम्मेवारी पुरा गर्दै आएको अवस्थामा उक्त कल्याण कोषको रकम हिनामिना गरेको आरोप लगाई अमानवीय तरिकाले मलाई सो समितिबाट निलम्बन गर्ने काम भएकोले पुन: बहाली गरिपाउँ भन्ने समेत ब्यहोराको उजुरी सम्बन्धमा अनुसन्धान हुँदा निज तत्कालीन लेखा अधिकृत टोप बहादुर महतराले समितिमा कार्यरत रहँदा सो समितिका अन्य छ जना कर्मचारीहरूको नाममा सापटी रकम स्वीकृत भई निजहरूको नाममा चेक समेत जारी भएकोमा उक्त चेकहरू सम्बन्धित ऋणीहरूलाई हस्तान्तरण गर्नु पर्नेमा सो नगरी उक्त चेकहरू आफै बैङ्कमा लगी भजाई कर्मचारीहरूको जम्मा रू.४,३०,०००।– (चार लाख तिस हजार) आफूले नै लिए खाएको र सोही समितिको रकम समेत सापटी भनि लिने खाने मनसायले समितिको कर्मचारी कल्याणकोषबाट रू.२,३१,७१८।९५ ( दुइ लाख एकतिस हजार सात सय अठार रूपैंया पञ्चानब्बे पैसा )सापटी लिई सो रकम समेत समितिलाई हाल सम्म फिर्ता नगरी ब्याज समेत जम्मा रू. ७,४०,५२५।५३ (सात लाख चालिस हजार पाँच सय पच्चिस रूपैंया त्रिपन्न पैसा ) आफैले लिई आफू राष्ट्रसेवक कर्मचारी भई आफ्नो पदको दुरूपयोग गरी गैरकानुनी रूपमा बदनियतपूर्वक संस्थालाई हानिनोक्सानी पुर्यानइ आफूलाई प्रत्यक्ष फाईदा पुर्यादउने कार्य गरी भ्रष्टाचार निवारण ऐन,२०५९ को दफा १७ बमोजिमको कसुर अपराध गरेको पुष्टि हुन आएकोले निजलाई भ्रष्टाचार निवारण ऐन, २०५९ को दफा ३ को उपदफा(१) र दफा ३ को उपदफा (१) को देहाय (ङ) बमोजिम सजाय हुन र निज प्रतिबादीबाट सोहि ऐनको दफा १७ बमोजिम बिगो रू.७,४०,५२५।५३ रेडीयो प्रसार सेवा विकास समिति कर्मचारी कल्याण कोषलाई दिलाई भराउन समेतको मागदाबी लिई आज बिशेष अदालत काठमाडौंमा आरोप-पत्र दायर गरिएको छ ।
