धनुषा । प्रथम राष्ट्रपति डा. रामवरण यादवले प्रतिनिधिसभा पुनःस्थापना गर्ने फैसला गरेर सर्वोच्च अदालतले मुलुकको लोकतन्त्रलाई जोगाएको दावी गरेका छन् ।
कांग्रेस जिल्ला कार्यसमिति धनुषाले जनकपुरमा बिहीबार आयोजना गरेको महेन्द्रनारायण निधिको ९९ औं जन्मजयन्ती समारोहलाई सम्बोधन गर्दै पूर्वराष्ट्रपति डा. यादवले अदालतले लोकतान्त्रिक संविधानलाई बचाएको बताएका हुन् ।
‘लोकतन्त्र, संघीयता र समावेशीमा विश्वास गर्नेको जित भएको छ’, डा.यादवले भने, ‘अदालतले लोकतान्त्रिक संविधानलाई बचाएको छ । मुलुकमा लागेको ग्रहणलाई अदालतले संविधानअनुसार हटाएको छ , अदालतलाई नमन’ उनले भने ।
यादवले राजनीतिभित्र चिरा परेको लोकतन्त्र बलियो नभएसम्म मुलुकमा लोकतन्त्र कार्यान्वयन नहुने बताएका छन् । राजनीति दल विधि र प्रक्रियाअनुसार नचलेर चिरा परेकोले मुलुकमा समस्या आएको उनको दावी थियो ।
प्रतिनिधिसभा विघटन बदरपछि चार वा पाँच चरणमा सरकार गठन प्रयासपछि मात्र मुलुकमा निर्वाचन हुने बताउँदै डा. यादवले लोकतन्त्र रक्षा गरी संविधान कार्यान्वयनका लागि अदालत र निर्वाचन आयोग निष्पक्ष हुनु पर्ने बताए ।
डा. यादवले नेपालको राजनीति दलमा आर्थिक अनुशासन नभएको टिप्पणी गरे । कांग्रेस, नेकपा र मधेसवादी दलसहित कुनै पनि दलमा आर्थिक अनुशासन नभएको उनले आरोप लगाए ।
