मोरङ, १५ फागुन ।
मोरङका् केराबारी गाउँपालिका ७ नर्कटेस्थित एक बिहे घरमा डकैती र आक्रमण भएको छ । शनिबार बिहान करिब चार बजेको समयमा भागीमान लिम्बूको घरबाट डाँकाहरुले ६ लाख मूल्य बराबरको नगद तथा गरगहना लुटिएको हो ।
डाँकाहरुले प्रहार गरेको घरेलु हतियारले बेहुलीका बुवालगायत चार जना घाइते भएका छन् । बेहुलीका भागीमान, दिदी सविना लिम्बू राई, कान्छा मामा केराबारी ९ का भगत याक्खा र जन्ती आएका भोजपुरका रमेश राई डाँकाले प्रहार गरेको घरेलु हतियारले घाइते भएका छन् । उनीहरुको न्यूरो अस्पताल विराटनगरमा उपचार भइरहेको प्रहरी उपरीक्षक सन्तोष खड्काले बताए ।
घाइतेमध्ये भागीमान र भगतको अवस्था गम्भीर छ । उनीहरुको टाउको, खुट्टा, हात, अनुहारलगायत शरीरका विभिन्न भागमा गहिरो चोट लागेको उपचारमा संलग्न चिकित्सकले बताए । खुकुरी प्रहार गरिएका भागीमानको टाउकोमा १३ वटा टाँका लगाइएको छ । भगतको दायाँतर्फको करङबाट भालाले प्रहार गरेकाले फोक्सोमा चोट देखिएको चिकित्सकको भनाइ छ ।
लिम्बूकी छोरी सम्झनाको विवाह सकिएर सबै जना सुतेपछि १०÷१५ जनाको समूहमा आएका डाँकाहरुले आक्रमण गरी डकैती गरेको जिल्ला प्रहरी मोरङले जनाएको छ । बिहे सम्पन्न भएपछि साउण्ड सिस्टम बन्द गरेर घरका सबै जना सुतिसकेको अवस्थामा मादक पदार्थ सेवन गरी राति १० बजे आएका युवाहरुको समूहले साउण्ड बजाएर नाच्न पाउनुपर्ने भन्दै विवाद गरेका थिए । ‘स्थानीयले उनीहरुलाई सम्झाईबुझाई गरी फर्काइ दिएको तर त्यसको १ घण्टापछि पुनः आएर होहल्ला गर्न थालेपछि इलाका प्रहरी केराबारीका प्रहरी टोली घटनास्थल पुगेपछि उनीहरु भागेका थिए,’ उनले भने, ‘राति ३ बजेतिर त्यही समूहले घरेलु हतियारसहित ढुंगामुढा गर्दै बिहे घरमा आक्रमण गरेर लुटपाट मच्चाएको छ ।’ यो घटनाले स्थानीयहरुले असुरक्षित महशुस गरेका छन् ।
