काठमाडाैं । कोरोना संक्रमणले भयावह बनेको भारतबाट नेपाल फर्किएका नेपालीलाई सीमामा नरोकिने भएको छ । सरकारले निषेधाज्ञाको समयमा पनि भारतबाट फर्किने नेपालीलाई सीमामा नरोक्ने भएको हो ।
निषेधाज्ञा नभएका र सार्वजनिक सवारीसाधन सञ्चालनमा रहेका नाकाबाट आफैँ जाने भएपनि निषेधाज्ञा भएका जिल्लाले विशेष व्यवस्था गरिएको छ ।
सरकारले मुख्य नाका छलेर आउनेलाई भने रोक्ने गरेको छ । तर सरकारले नै तोकेका २० वटा नाकाबाट आउन रोकतोक नहुने स्थानीय प्रशासनले जनाएका छन् ।
सरकारले भारतबाट आउनेका लागि पशुपतिनगर, काकडभिट्टा, रानी, कुनौली, ठाडी, माडर, भिट्टामोड, मलंगवा, गौर, वीरगञ्ज, महेशपुर, बेलहिया, तौलिहवा, कृष्णनगर, जमुनाह, सुरजपुर, गौरिफन्टा, गड्डाचौकी, झुलाघाट र दार्चुला नाका तोकेको छ ।
भारतबाट आउनेलाई नाका रहेकै जिल्लामा व्यवस्थापन गर्न नसकिने भएकाले घरतिरै पठाउने गरिएको स्थानीय प्रशासनले जनाएको छ । गत वर्ष लकडाउन गर्दा सरकारले सीमानाका समेत बन्द गर्दा हजारौँ नेपाली सिमानामा अलपत्र परेका थिए। सिमानामा अव्यवस्थित बस्दा कोरोना समेत फैलिएको भन्दै सरकारको चर्को आलोचना भएको थियो ।
कोरोना संकट व्यवस्थापन समितिको तथ्यांकअनुसार विमानमार्फत ३५ हजार ८ सय ७१ जना नेपाल आएका छन् ।
