काठमाडौं । नेकपा एमालेका अध्यक्ष केपी शर्मा ओलीले शुक्रबार बालुवाटारमा बसेको केन्द्रीय समिति बैठकमा सुरुमै नेता वामदेव गौतमलाई स्वागत गरे । बैठकमा स्वागत गर्दै पार्टी उपाध्यक्ष गौतमलाई उनले भने, ‘अलिक लामो समयपछि बैठकमा आउनुभएका उपाध्यक्ष कमरेडलाई हार्दिक स्वागत छ । यो फेरि आयो, गयो नहोस् ।’ उनले नेता गौतमलाई सधैँ आउन आग्रह गरेका थिए ।
यस्तै, शनिबार बस्ने केन्द्रीय कमिटी बैठकमा सहभागी हुन वरिष्ठ नेता माधवकुमार नेपाल समूहलाई आह्वान गरेका छन् । बैठकलाई सम्बोधन गर्दै अध्यक्ष ओलीले उपाध्यक्ष गौतमलाई स्वागत गर्दै अन्य नेताहरु पनि बैठकमा आउनुपर्ने बताए ।
अध्यक्ष ओलीले भने, ‘उहाँलाई स्वागत गर्दै अन्य कमरेडहरुलाई पनि भोली हुने बैठकमा सहभागी हुन आग्रह गर्छु ।’ उनले पार्टी एकताको कुरा अगाडि बढिरहेका बेला तर्केर हिडेर समस्या सामधान नहुने पनि बताए ।
