काठमाडौं । सशक्त प्रहरी बलका आठै बाहिनीका प्रमुखहरुको सरुवाको समय तयारी अघि बढेको छ । बाहिनीपति हुनका लागि डिआइजीहरु शक्तिकेन्द्र धाइरहेका छन् ।
डिआइजीहरु कमल गिरी, दुर्गा प्रसाद भट्टराई, गणेश ठाडा मगर, कुल बहादुर नेम्वाङ बाहिनीपति हुने दौडमा छन् । आठ बाहिनीमध्ये सुदुरपश्चिम बाहिनी हाल रिक्त छ । हालै बढुवा भएका डिआइजीद्वय कालिदास धौवजी र कुमार न्यौपाने पनि बाहिनीपति हुने दौडमा छन् । सशस्त्रमा केही डिआइजीले दुई पटकसम्म बाहिनीपति भएर काम गरिसकेका छन् । अहिले पनि केही डिआइजी इन्चार्जबाट इन्चार्जमै सरुवा हुने सम्भावना छ । प्रहरी एकेडेमी र स्टाफ कलेजमा पनि डिआइजी इन्चार्ज हुन्छन् । सरुवाका लागि दौडधुप चलिरहेकै बेला सरकार परिवर्तन हुने भएपनि सरुवाको लिष्ट पनि अब हेरफेर हुने सम्भावना छ ।
सशस्त्रमा सरकारले ध्यान नदिदा प्राविधिक सइबाट भर्ना भएकाहरु बाहिनीपति हुने अवस्था आएको छ । हालै डिआइजीमा बढुवा भएका धौबजी र न्यौपाने नेपाल प्रहरीको प्राबिधिक सइबाट सेवा प्रबेश गरेका हुन् । प्राविधिक सइमा भर्ना भएका बढुवाबाटै डिआइजीसम्म पुग्ने बिरलै घटना भएको छ ।
अर्काेतर्फ असइबाट भर्ना भएकाहरु एसपी हुने दौडमा छन् । एसपी बढुवा लागि केही दिन अघि प्रकाशित सुचना अनुसार अब नेपाल प्रहरीमा असइबाट सेवा प्रबेश गरेका केही प्राबिधिक पृष्ठभूमिका प्रहरी एसपी बन्नेछन् र उनीहरु नै गणपति बन्ने सम्भावना छ ।
यसरी असइ र सइमा भर्ना भएकाहरुको नेतृत्वमा रजगज चलिरहंदा इन्सपेक्टरमा भर्ना भएका अधिकृतहरुको भने संगठनमा रुवाबासी छ । इन्सपेक्टरमा भर्ना भएकाहरु १६ वर्षसम्म बढुवा हुन सकेका छैनन् । इन्सपेक्टरमा भर्ना भएका एसपीमै अवकाश हुने अवस्था आउँदा सइमा भर्ना भएका भने डिआइजी भइसकेका छन् । नेतृत्वले ध्यान दिन नसक्दा सशस्त्रको सिंस ७ सम्मका इन्सपेक्टर प्रताडित हुने देखिएको छ ।
