जङ्गलमा पनि दसैँ आउँछ
वनमा घुम्ने–फिर्ने,
जङ्गलमै रमाउने
हामीलाई पनि दसैँ आउँछ
दसैँ आएपछि
हामीलाई पनि मासु खानुपर्छ
हामी बोकाबाख्रा,
भेंडाच्याङ्ग्रा, राँगो केही पाल्दैनौँ
हामी हिँडिरहने जात–
एउटा पोखरी समाएर माछा पाल्न सक्दैनौँ
अचेल बाँदर, गुना त्यति पाइँदैनन्
फलफूल–कन्दमूल सिलो खोज्नुपर्छ
जङ्गलीहरूले जङ्गल नै मासिदिए
र हाम्रा उठिबास गरिदिए
कोसी, मधुस बनाउने काठ छैनन्
के बनाउने, के बेच्ने ?
केही कोसेली ल्यायाका छौ कि
खसी र चामल ल्यायाका छौ कि
हाम्रा कुलदेवतालाई हामीले पनि त बलि दिनुपर्छ
नभए देउता रिसाउला, सिकार बिगार्लान्
छ भने हामीलाई अलिकति पैसा देऊ–पाप लाग्दैन
रक्सी देऊ, सुर्ती–चुरोट देऊ,
मोल्न देऊ, मात्न देऊ,
घरपरिवार बिर्सन देऊ
हामी पनि फूल हौँ यस बारीको
फुल्न देऊ, फल्न देऊ
तिमीहरू सहर– बजारमै बस
हामीलाई वन देऊ,
एक राज्य देऊ, प्रदेश देऊ
खुकुरीलाई दाप र बिँड हामी दिन्छौँ तिमीलाई
शत्रुसित भिड्न हामीलाई पनि एक हतियार देऊ
हामी फिरन्ते यस युगको
एक सभ्यता हामी पनि दिन्छौँ यस देशलाई
हिँड्न, फिर्न त देऊ
एक जङ्गल देऊ
एक मङ्गल देऊ ।
